नब्बेवटा विद्यालय व्यवस्थापन समितिविहीन

भरतपुर । चितवनका ९० सामुदायिक विद्यालय व्यवस्थापन समितिबिना नै चलेका छन् । विद्यालय व्यवस्थापन समिति गठन गर्ने विषयमा राजनीतिक खिचातानी बढेपछि विद्यालयहरु व्यवस्थापन समितिविहीन चलेका हुन् ।

ती विद्यालयहरुको शैक्षिकस्तर पनि खस्कँदै गएको छ । चितवनको रत्ननगर नगरपालिकामा चारसहित भरतपुर नगरपालिका र गाविसका गरी ९० विद्यालय व्यवस्थापन समिति नरहेको जिल्ला शिक्षा अधिकारी रमाकान्त शर्माले जानकारी दिनुभयो ।
व्यवस्थापन समितिको अभावमा ती विद्यालयलाई सरकारी अनुदान र सहयोग दिन पनि अप्ठेरो रहेको उहाँले बताउनुभयो । आफूले विद्यालय व्यवस्थापन समिति गठन गर्न ताकेता गरेपनि अहिलेसम्म गठन हुन नसकेको उहाँको भनाइ थियो ।
राजनीतिक खिचातानीकै कारण आफ्नो विद्यालयमा व्यवस्थापन समिति गठन गर्न नसकिएको नेपाल उच्च माविका प्राचार्य गोपाल शर्मा बताउनुहुन्छ । अधिकांश विद्यालयको म्याद नाघेको दुई वर्ष पुगिसकेका छन् । सदरमुकाम भरतपुर क्षेत्रका विद्यालयहरु पनि विद्यालय व्यवस्थापन समितिबिना सञ्चालनमा रहेका छन् ।
सामुदायिक मात्र हैन संस्थागत विद्यालय पनि मनोमानी ढङ्गले सञ्चालन भइरहेको जिल्ला शिक्षा अधिकारी शर्मा बताउनुहुन्छ । विद्यालय व्यवस्थापन समितिको पदमा बस्न मरिहत्ये गर्ने तर काम गर्ने बेला उपस्थित नहुने प्रवृत्तिका कारण शैक्षिक सुधारमा असर परेको शिक्षकहरु बताउँछन् । चितवनमा ३९१ सामुदायिक विद्यालय तथा १६० संस्थागत विद्यालय छन् ।