२१७ बालबालिका सशस्त्र समूहमा

नवलपरासी । नवलपरासीमा २१७ जना बालबालिका सशस्त्र फौज तथा समूहमा आवद्ध भएर काम गर्न बाध्य भएका सोमबार परासीमा आयोजित एक कार्यक्रममा जानकारी दिइएको छ ।

बालबालिकाको क्षेत्रमा कार्यरत ‘इन्द्रेणी समाज केन्द्र नेपाल’ नामक गैर सरकारी संस्थाले परासीमा आयोजना गरेको अर्धवार्षिक समीक्षा कार्यक्रममा जानकारी दिइएको हो ।

कार्यक्रममा केन्द्रका कार्यक्रम संयोजक वीरेन्द्र थापाले २४४ जना बालबालिका जोखिमयुक्त अवस्थामा र यी सबै गरी विभिन्न प्रकारका जोखिममा ४७३ बालबालिका सशस्त्र द्वन्द्वमा फसेको जानकारी दिनु भएको थियो ।

प्रमुख जिल्ला अधिकारी वीरबहादुर राई अतिथि रहनुभएको कार्यक्रममा महिला तथा बालबालिका कार्यालयका प्रमुख मीना पौडेल, सहकर्मी टीकाराम गैरे, जिल्ला प्रहरी कार्यालय महिला सेलकी उषा ढुंगानालगायतले कार्यक्रमको बारेमा प्रकाश पार्नु भएको थियो ।