चितवनमा नयाँ कलेजको स्थापना

भरतपुर । शैक्षिक नगरी चितवनमा नयाँ कलेजले आफ्नो शैक्षिकयात्राको थालनी गरेको छ । भारतको सिक्किम मणिपाल विश्वविद्यालयको सम्बन्धनमा काठमाडौंको लर्डबुद्ध एजुकेसनल फाउन्डेसनको सहकार्यमा नारायणी कलेज फर प्रोफेसनल स्टडिज् (एनसीपीएस)ले यसै शैक्षिकसत्रदेखि स्नातकतहको कक्षाहरु सञ्चालन गर्न लागेको हो ।
शुक्रबार कलेजमा आयोजना गरेको पत्रकार सम्मेलनमा कलेजका अध्यक्ष पंकज जलानले सो जानकारी गराउनुभएको हो । कलेजले यसै शैक्षिकसत्रदेखि तीन वर्षे स्नातकतहका कक्षाहरु सञ्चालन गर्न लागेको उहाँले बताउनुभयो ।
कलेजले तीन वर्षे बीबीए र बीएस्सी आईटीका कक्षा सञ्चालन गर्न लागेको हो । नेपाल सरकारको स्वीकृतिमा त्रिभुवन विश्वविद्यालयको सम्बन्धनमा काठमाडौंमा १४ वर्षदेखि सञ्चालित फाउन्डेसनले चितवनका विद्यार्थीलाई केन्द्रमा धाउनुपर्ने बायध्तालाई कम गर्नका लागि कलेज सञ्चालन गर्न लागिएको अध्यक्ष जलानले बताउनुभयो ।
कलेजले बीबीएमा ६० र बीएस्सी आईटीमा ३० जना विद्यार्थीलाई भर्ना लिई कक्षा सञ्चालन गर्ने जनाएको छ । तीन वर्षको कोर्ष पूरा गर्न विद्यार्थीहरुले रु दुई लाख ८८ हजार रुपैयाँ तिर्नुपर्ने अध्यक्ष जलानले जानकारी दिनुभयो ।
‘अमेरिकामा भन्दा अन्य मुलुकमा चार वर्षे स्नातकको कक्षा सञ्चालन छैन, यो अवस्थामा हामीले चार वर्षे कुन आधारमा बनाउने, नेपाली विद्यार्थीहरु अमेरिकी बजारमा मात्र बिक्ने होइनन्’, उहाँले भन्नुभयो ।
अहिले कलेजले १२ कक्षाको परीक्षा दिएर बसेका विद्यार्थीहरुलाई भर्ना लिई कक्षा सञ्चालन गरेको कलेजका निर्देशक नितिन अग्रवालले बताउनुभयो ।