नेपाली काँग्रेस चितवन विघटन

भरतपुर । नेपाली काँग्रेस केन्द्रीय समितिले जिल्ला कार्यसमिति चितवन विघटन गरेको छ । तरुण दल चितवनका अध्यक्ष शिव पौडेलको हत्या प्रकरणमा पार्टी जिल्ला नेतृत्वले असहयोग गरेको भनी पार्टी केन्द्रीय समितिले जिल्ला सभापति विकास कोइरालासँग स्पष्टीकरण सोधेको र चित्त बुझ्दो स्पष्टीकरण नआएको भन्दै जिल्ला कमिटी चितवन विघटन गरेको हो ।
झण्डै दुई वर्षअगाडि विकास कोइरालाको नेतृत्वमा निर्वाचनबाट जिल्ला कार्यसमिति गठन भएको थियो । हत्या अभियोगमा पुर्पक्षका लागि भरतपुर कारागारमा रहेका समयमा तरुण दल चितवनका अध्यक्ष पौडेलको हत्या भएको थियो ।
सो घटना पछि काँग्रेस चितवनको गतिविधि प्रायः शून्यजस्तै भएको थियो । काँँग्रेस केन्द्रीय समिति बैठकले आज बिहीबार काँग्रेस चितवनको तदर्थ समिति गठन गर्ने निर्णयसमेत गरेको छ ।