भृकुटी कागजका मजदुरले ज्ञापनपत्र बुझाए

नारायणगढ । नवलपरासी गैँडाकोटमा रहेको भृकुटी कागज कारखानामा कार्र्यरत मजदुरहरुले सोमबार चितवन र नवलपरासीका विभिन्न निकायमा ज्ञापनपत्र बुझाएका छन् । झण्डै डेढ वर्षदेखि उत्पादन बन्द रहेको भृकुटीका मजदुरहरुले २० महिनादेखि तलब पाएका छैनन् ।
मजदुर संघर्ष समितिले कारखानापरिसर गैँडाकोटबाट जुलुस निकालेर नारायणगढ पुलचोकमा कोणसभा गर्नुका साथै विभिन्न निकायमा ज्ञापनपत्र बुझाएको हो । संघर्ष समितिले गैँडाकोट इलाका प्रहरी कार्यालयमार्फत नवलपरासी जिल्ला प्रशासनमा, वडा प्रहरी कार्यालय नारायणगढमार्फत चितवन जिल्ला प्रशासनमा ज्ञापनपत्र बुझाएका छन् ।
त्यस्तै चितवन उद्योग वाणिज्य संघमार्फत नेपाल उद्योग वाणिज्य महासंघमा र नेपाल बैंकको नारायणगढ शाखा कार्यालयमार्फत बैंकको केन्द्रीय कार्यालयमा ज्ञापनपत्र बुझाएका छन् । नेपाल बैंकमार्फत भृकुटीमा एक अरब रुपैयाँभन्दा बढी ऋण प्रवाह भएको संयुक्त समस्या सामाधान तथा संघर्ष समितिका मजदुर नेता हेमराज खनालले बताए ।
यसअघि संयुक्त समितिले माग पूरा गराउन समयसीमा तोकेर कारखाना सञ्चालक तथा सरोकारवाला निकायमा पत्राचार गरेको थियो ।  साउन २५ गतेसम्म सञ्चालन हुने पहिलो चरणको आन्दोलनबाट माग पूरा नभए सबै मजदुर कर्मचारीहरु कारखानाको काठमाडौंमा रहेको केन्द्रीय कार्यालयमा धर्ना दिन जाने संयुक्त समितिले जारी गरेको प्रेस विज्ञप्तिमा उल्लेख छ ।
देशकै ठूलो भृकुटी कागज कारखानाले विसं २०६७ साल फागुनदेखि उत्पादन बन्द गरेपनि कारखानामा कार्यरत मजदुर, कर्मचारी र सुरक्षा गार्ड गरेर ३४७ जनाले विसं २०६७ साल मंसिरयता तलब नपाएको संयुक्त संघर्ष समितिले जानकारी दिएको छ ।
चीन सरकारको सहयोगमा बनेको सो कारखाना विसं २०४९ सालमा निजीकरण भएपछि गोल्छा समूहले सञ्चालन गरेको थियो ।
मजदुरहरुले तलब भत्ता तुरुन्त भुक्तानी हुनुपर्ने, कारखाना सञ्चालन हुनुपर्ने र बिमा र सञ्चयकोषको रकम पूरा दाखिला हुनुपर्नेलगायतका पाँचवटा माग राखेर संघर्षका कार्यक्रम घोषणा गरेका छन् । कारखानमा कार्यरत विभिन्न मजदुर संगठनले संयुक्त रुपमा सञ्चालन गर्ने आन्दोलनमा जिल्लाका सबै दलले समर्थन र सहयोग गर्ने भएका छन् ।
भृकुटीले महिनाको सरदर एकहजार ५३० टनसम्म कागज उत्पादन गर्दै आएको थियो । प्रतिटन कागजको न्यूनतम ६० हजार रुपैयाँ पर्छ । भृकुटीको उत्पादन रोकिँदा कागजका लागि महिनाको नौ करोड रुपैयाँ विदेशिएको कारखाना सोतको भनाइ छ ।
मजदुरहरुले श्रम कार्यालयमा उजुरी दिएपछि सो कारखानाको नाममा रहेको ५३ बिघा जग्गा पनि रोक्का भएको छ । कारखाना सञ्चालकले कागज उत्पादन बन्द गरेर त्यहाँको जग्गा प्लटिङ गर्न लागेको मजदुर संगठनहरुको भनाइ छ । यसका लागि गत वर्ष भएको कारखाना सञ्चालक समितिको विशेष भेलाले कारखानाको उद्देश्य पनि परिवर्तन गरेको मजदुर प्रतिनिधिहरु बताउँछन् । देशमा कागजको माग निकै उच्च रहेका बेला कारखाना बन्द गर्न नहुने मजदुर संगठनहरुको माग रहेको छ ।
‘छिमेकी देशले सद्भाव स्वरुप बनाइदिएको उद्योग निजीकरण भयो र अहिले आएर उद्देश्य नै परिवर्तन गरेर कागज उत्पादन बन्द गरेर घडेरी बेच्ने योजना बनाइयो । यस्ता कुराका विरुद्ध सरकार बेलैमा जागेन । अब चाँडै जागोस् भन्ने हाम्रो माग छ’, संघर्ष समितिका संयोजक राम शर्माले भने । सरकारले सुरूदेखि नै उद्योगको प्रभावकारी अनुगमन नगर्नाले अहिले समस्या आएको उनले बताए ।

फोटो क्याप्सन ः
आन्दोलन ः सोमबार भृकुटी कागज कारखानाका मजदुरहरुले नारायणगढमा निकालेको जुलुस ।