अनेकिमहासंघ (क्रान्तिकारी)सँग सम्बन्ध विच्छेद

भरतपुर । नवगठित नेकपा–माओवादीनिकट किसानहरुको १२ देखि १४ गतेसम्म नवलपरासीको प्रगतिनगरमा सम्पन्न केन्द्रीय भेलाले एकीकृत नेकपा माओवादीनिकट अखिल नेपाल किसान महासंघ क्रान्तिकारीसँग सम्बन्ध विच्छेद गर्ने निर्णय गरेको छ ।

भेलाले ठाकुरप्रसाद चापागार्इंको अध्यक्षतामा केन्द्रीय सम्मेलन आयोजक समितिसमेत गठन गरेको सोमबार भरतपुरमा आयोजित पत्रकार सम्मेलनमा नवगठित समितिका अध्यक्ष चापागाईंले जानकारी दिनुभयो ।
भेलाले सुवास अगस्ती र भुमिश्वर कँडेल उपाध्यक्ष तथा नन्दबहादुर बूढा मगर महासचिव रहेको ८१ सदस्यीय प्रथम केन्द्रीय सम्मेलन आयोजक समिति गठन गरेको छ ।
पत्रकार सम्मेलनमा बोल्दै उहाँले किसानहरुले जनयुद्ध गर्दा देखेको सपनामाथि कुठाराघात भएका कारण महासंघसँग सम्बन्ध विच्छेद गर्नु परेको बताउनुभयो । ‘जुन किसान प्रत्यक्ष रुपमा युद्धमा लाग्यो, परिवर्तनका लागि लड्यो त्यसले के पायो ?’, उहाँको प्रश्न थियो ।
संगठनले आगामी दिनमा किसान संघर्ष सञ्चालन गर्ने निर्णय भएको समेत अध्यक्ष चापागार्इंले जानकारी दिनुभयो । ‘भू–माफिया, जलमाफिया, वनमाफियाजस्ता कुख्यात किसानमाराहरु विरुद्ध भण्डाफोर अभियान सञ्चालन गर्दै किसान आन्दोलनलाई सशक्त ढङ्गले अगाडि बढाउने निर्णय भएको छ’, उहाँले भन्नुभयो ।
शान्तिकालमा एकीकृत नेकपा माओवादीले देखाएको किसानविरोधी चरित्रका कारण सो पार्टीसँग सम्बन्ध विच्छेद गर्दै नवगठित माओवादीको सिद्धान्त र कार्यदिशालाई आत्मसाथ गर्दै अगाडि बढ्ने नवगठिन अखिल नेपाल किसान संघ (क्रान्तिकारी)ले जनाएको छ ।
यता, कार्यक्रममा बोल्दै नवगठित माओवादीका केन्द्रीय सदस्य तथा अवध राज्य समितिका इञ्चार्ज अटलले संक्रमणकालमा क्रान्तिकारी सरकार बने त्यसमा सहभागी हुन सक्ने बताउनुभयो । ‘हाम्रो तीन ‘स’को नीति कायम नै छ, संक्रमणकालमा क्रान्तिकारी सरकार निर्माण भए त्यसमा सामेल हुन सकिन्छ’, उहाँले भन्नुभयो । माओवादीले सरकार सदन र सडक आन्दोलनलाई एकै साथअगाडि बढाउने नीति लिँदै आएको छ ।
संगठनको प्रथम केन्द्रीय सम्मेलन असोज २४–२६ सम्म मधेश राज्यभित्र गर्ने संगठनका महासचिव बूढामगरले जानकारी दिनुभयो । त्यसभन्दा अगाडि राज्य तथा जिल्लाका सम्मेलन सम्पन्न गरिसक्ने उहाँले बताउनुभयो ।