मालिकद्वारा चालकलाई बसै उपहार

भरतपुर । आफ्नो सक्रिय उमेरभर अर्कैको उन्नतीमा लागि खर्चने मजदुरहरुको बारेमा सोच्ने कसको फुर्सद हुन्छ र यहाँ ? फेरी सबै मालिकहरु सबैजस्ता पनि हुँदैनन् । उनीहरुले आफ्नालागि जीवन समर्पण गर्ने मजुरका लागि पनि सोच्छन । यस्तै उदाहरण हुन चितवनका यातायात व्यवसायी बद्रीप्रसाद पौडेल ।

उनले लामो समयसम्म आफ्नो भाडाको बस चलाएर सेवा गर्ने चालक विशेश्वर हमाललाई ५० हजार नगदसहित सोही बस नै उपहार दिएका छन । नारायणगढ–भण्डारा चल्ने बा १ ख ७१७ नम्बरको बस पौडेलले हमाललाई सोमबार गैंडाकोटमा एक कार्यक्रमका बीच प्रदान गरेका हुन ।

विगत २२ वर्षदेखि निरन्तर आफ्नो सेवा गरेकाले सो बस उपहार दिएको पौडेलले सञ्चारकर्मीहरुलाई बताए । ‘उसै (चालक)का कारण मैले आज यो सम्मान पाएको छु । छोराछोरी राम्रोसँग पढाउन पाएको छु’, पौडेलले भने, ‘अब उसैले चलाएको बस उसैलाई हस्तान्तरण गरेको हुँ ।’

कार्यक्रममा नेपाल यातायात व्यवसायी महासंघका अध्यक्ष योगेन्द्रनाथ कर्माचार्यले बसको चाबी चालक हमाललाई बुझाएका थिए । चालकबाट एकाएक बस मालिक बनेका हमालले पनि खुसी हुँदै निरन्तर गरेको सेवाको फल आफूले पाएको प्रतिक्रिया दिए ।

चितवन यातायात व्यवसायी संघ छहारीका अध्यक्षसमेत रहेका पौडेलले लगानीकर्ता र मजदुरबीचको सम्बन्ध सुमधुर रहनुपर्छ भन्ने उदाहरणका रुपमा आफूले यो कार्य गरेको बताए ।
सो बस २०५६ सालमा आठ लाख रुपैयाँमा खरिद गरिएको हो । अहिले यो बसको मूल्य करिव ६ लाख रुपैयाँ पर्ने बताइएको छ । खरिद गरेदेखि नै सो बस चालक हमालले नै चलाउँदै आएका थिए ।

पौडेलका अहिले पनि अन्य तीनवटा भाडाका बस सञ्चालनमा रहेका छन् ।