ढेगनी हत्याका आठ अभियुक्तलालाई जन्मकैद

भरतपुर । बोक्सीको आरोपमा जिउँदै जलाएर हत्या गरिएकी माडी बघौडाकी ढेगनीदेवी महतोको हत्या प्रकरणमा झाँक्री जुगेश्वर महतोसहित आठ जनाको संलग्नता रहेको अदालतले पुष्टि गरेको छ ।

सो हत्या प्रकरणमा संलग्न रहेका ढेगनीकै छिमेकी विक्रम महतोको सात जना परिवारका सदस्यसहित झाँक्री जुगेश्वरलाई दोसी ठहर गर्दै चितवन जिल्ला अदालतले जन्मकैदको फैसला गरेको हो ।

जिल्ला न्यायाधीश भोलानाथ चौलागार्इंको एकल इजलासले सोमबार गरेको फैसलाले  विक्रम, उनकी श्रीमती विक्रमिया, छोरीहरु मन्जु, लक्ष्मी, सन्जु, कृष्णकुमारी, ज्वाईं विक्रम र झाँक्री जुगेश्वरलाई जन्मकैदको सजाय सुनाएको हो ।

‘अदालतको फैसलाअनुसार उनीहरुलाई २० वर्ष जेल सजाय भएको छ’, अदालतका श्रेस्तेदार दिनबन्धु बरालले फैसलाका बारेमा जानकारी दिँदै चितवन पोष्टसँग भन्नुभयो, ‘फैसलाका बारेमा चित्त नबुझे पुनरावेदन गराउन पाउने कानुनी बाटो पनि खुला छ ।’

यस्तै, सोही हत्यामा संलग्न भएको अभियोग लागेका सरस्वती महतो, लक्ष्मी महतो र पशुपति महतोलाई भने अदालतले सफाइ दिएको छ । घटनामा उनीहरुको संलग्नता नदेखिएको फैसलामा उल्लेख भएको अदालतका श्रेस्तेदार बरालले बताउनुभयो । ‘सफाइ पाएकाको हकमा भने घटनामा उनीहरुको संलग्नता भएको प्रमाण देखिएन’, उहाँको जवाफ थियो । 

२०६८ फागुन ५ गते माडी बघौडाकी एकल महिला ढेगनीदेवी महतोलाई बोक्सीको अभियोगमा जिउँदै जलाएर हत्या गरिएको थियो । सो सम्बन्धी मुद्दा चैत २ गते अदालतमा दर्ता भएको थियो । मुद्दा सम्पादनका क्रममा चैत ६ गते थुनछेक गर्दै अदालतले आठै जनालाई पुर्पक्षका लागि थुनामा राख्ने आदेश दिएको थियो ।