बस दुर्घटनामा ३१ जनाको मृत्यु

घटनास्थलबाट घाइतेको उद्धार गर्दै नेपाली सेना र प्रहरी । फोटो ः एजेन्सी

धनगढी । धनगढी—डडेलधुरा राजमार्गको डोटी रुबसकाँडा सडकखण्डमा शनिबार बिहान बस दुर्घटना हुँदा कम्तीमा ३१ जनाको मृत्यु भएको छ ।

अछामको जयगढबाट धनगढीतर्फ आउँदै गरेको ना४ख ३६०३ नम्बरको कर्णाली रिभर यातायातको सो बस बिहान ३ः३० बजेको समयमा सडकबाट झन्डै ६ सय मिटर तल खसेर दुर्घटनाग्रस्त भएको प्रहरीले जनाएको छ । शनिबार अबेलासम्म २४ जनाको सनाखत भएको प्रहरीको भनाइ छ ।

घटनास्थलमा रहेका ट्राफिक प्रहरी योगेन्द्रबहादुर बोहराका अनुसार दुर्घटनामा परी बसमा सवार अछाम दर्ना गाविस–५ का तपेन्द्र ठकुल्ला, भरत ठकुल्ला, कमला ठकुल्ला, चक्र ठकुल्ला, देवानन्द खनाल, रुपबहादुर रावत, कमासिंह ठकुल्ला, दर्ना गाविस–६ का रङ्गीदेवी रावल, अछाम रामरोशन गाविस–९ का शेरबहादुर साउद र ठेगाना खुल्न नसकेका तुलाराम गिरीको सनाखत भएको छ ।

त्यसैगरी अछाम सिद्धेश्वर गाविस–९ का १८ वर्षीय विमल बुढा, मलाटीकोट गाविस–५ का रमिला साह, मङ्गलुेन गाविस–६ का चन्द्रदेव रेग्मी, बर्दादेवी गाविस–९ की २३ वर्षीया देवसरा ठकुल्ला र ५ की डम्मरीकुमारी ठकुल्ला, बस चालक कैलाली साडेपानी–३ का ३७ वर्षीय मम्कुराम चौधरी, सहचालक गणेश चौधरी, कैलाली भजनीका ५६ वर्षीय उज्जली बुढाको सनाखत भएको छ ।

घटनामा १३ जना घाइते भएकामा धेरैको अवस्था सिकिस्त रहेको छ । घाइतेहरुलाई धनगढीको अत्तरियास्थित पद्मा अस्पताल, सेती अञ्चल अस्पतालमा उपचारका लागि भर्ना गरिएको छ । यो राजमार्गमा भएको बस दुर्घटनाबाट यति ठूलो मानवीय क्षति पुगेको सम्भवतः यो पहिलो घटना हो ।

नेपाली सेना, प्रहरी र स्थानीयवासीको संयुक्त प्रयासमा दुर्घटनास्थलबाट मृतकको शव निकाल्ने तथा घाइतेको उद्धार कार्य भइरहेको छ । भिरालो, विकट एवं ठूलो खोच रहेका कारण उद्धार कार्य जटिल बनेको प्रहरीले बताएको छ । रासस