मकर मेलामा सुरक्षाकर्मीको बाक्लै उपस्थिति रहने

देवघाट । कालिगण्डकी र त्रिशूली नदीको संगमस्थल देवघाटधाममा माघे संक्रान्तिको दिन हुने मकर स्नान मेलामा सुरक्षाकर्मीको बाक्लो उपस्थिति रहने भएको छ । भीडभाडमा हुन सक्ने दुर्घटना र लुटपाट रोक्नमात्रै होइन, नदीमा नुहाउनेको सुरक्षाका लागि प्रहरी तैनाथ हुने छन् ।

देवघाट क्षेत्र विकास समितिले शनिबार आयोजना गरेको पत्रकार सम्मेलनमा दिइएको जानकारीअनुसार मेला क्षेत्रमा ४५० जना प्रहरी तैनाथ हुने छन् । भक्तजनको भीड लाग्ने क्षेत्र तनहँु र चितवन दुबैतर्फ सुरक्षाकर्मीको बाक्लै उपस्थिति रहने देवघाट क्षेत्र विकास समितिका अध्यक्ष खिमलाल भट्टराईले जानकारी दिनुभयो ।

‘यसका साथै गण्डकी र त्रिशूलीको संगमस्थलमा नुहाउँदा हुन सक्ने सम्भावित दुर्घटनालाई ध्यानमा राखेर हामीले सशस्त्र प्रहरीबल विपद व्यवस्थापन तालिम केन्द्र कुरिनटारबाट दुईवटा उद्धार ¥याफ्टिङ नदीमैै चल्ने छन्’ अध्यक्ष भण्डारीले भन्नभयो ।

एउटा ¥याफ्टिङमा १० जना सशस्त्र प्रहरी बस्ने छन् । नुहाउन आएका व्यक्तिहरु नदीमै डुबेर मर्ने घटना विगतमा बढी हुने गरे पनि केही वर्षयता फाट्टफुट्ट हुने गरेका छन् । यस्ता घटना नहोस् भन्नका लागि सधैँ चनाखो रहनु पर्ने र त्यसका लागि विषेश व्यवस्था गरेको भण्डारीले बताउनुभया ।

समितिले नदीको संगमस्थलमा डोरीको घेरा बनाएर नुहाउने क्षेत्र निर्धारण गरेको छ । डोरीको घेरोभन्दा बाहिर गएर नुहाउनु खतरायुक्त हुनेभन्दै सो घेरा नतोड्न समितिले सर्वसाधारणमा अपिल गरेको छ । नदी वारिपारि नुहाउन मिल्ने क्षेत्रमा डोरी टाँगिएको छ ।

मगर संक्रान्ति मेलामा पुलबाट ओहोरदोहोर गर्नेहरु सधैँ त्रासमा रहन्छन् । पुलको मर्मत गरेको तर पुलमाथि हिँड्दा नरोकिकन लाइनमा हिँड्न समितिले सर्वसाधारणलाई आग्रह गरेको छ । नदी तार्नका लागि डुंगा र ¥याफ्टिङ बोर्डको पनि पर्याप्त व्यवस्था भएको छ ।

क्षेत्र विकास समितिले डुंगाको एकतर्फी भाडा २० रुपैयाँ कायम गरेको छ । तर डुंगा चलाउनेले मनपरी भाडा लिने सम्भावना सधैँ रहन्छ । त्यसो भएमा समितिमा उजुरी गर्न समितिका अध्यक्ष भण्डारीले आग्रह गनुभयो ।

मेला अवधिमा जाने गाडीहरु रामनगर हुँदै देवघाट पुग्छन् र फर्कने बेलामा मात्रै पुरानो रुट प्रयोग गर्छन् । समितिले साइकलको पार्किङ शुल्क १०, मोटरसाइकलको २०, कार, जीप, भ्यानको ५० र ठूला बसको एक सय रुपैयाँ तोकेको छ ।

देवघाटमा माघे संक्रान्तिमा नुहाउन देशका विभिन्न ठाउँका साथै भारतबाट समेत भक्तहरु आउने गर्छन् । विभिन्न ऋषिहरुले तपस्या गरेको, सीता विलय भएकोजस्ता धार्मिक कथन देवघाटसँग जोडिएको छ । सेन राजा मुकुन्द सेनको सम्बन्ध पनि देवघाटसँग जोडिएको छ ।

मेलामा एक लाखभन्दा बढी श्रद्धालुहरु आउने क्षेत्र विकास समितिको अनुमान छ । देवघाटमा स्नान गर्न आउनेहरु अघिल्लो दिन रातभर जाग्राम बसेर भोलिपल्ट संक्रान्तिको बिहानै संगमस्थलमा डुबुल्की लगाउँछन् । आज आइतबार बिहान ९ बजे महेश सन्यास आश्रमका पिठाधीश स्वामी रामानन्द गिरीले संगममा लिंगो गाडेपछि मकर मेला आरम्भ हुन्छ ।