चिसोको कारण जनजीवन प्रभावित, चिसोका कारण मृत्यु हुनेको संख्या २३

भरतपुर । लगातारको चिसोको कारण चितवनलगायत यस क्षेत्रको जनजीवन प्रभावित भएको छ । लगातार केही दिनदेखि बढेको चिसोको कारण यस क्षेत्रको तापक्रममा एक्कासि घटेको छ ।

चितवनमा सोमबार न्यूनतम १ डिग्री सेल्सियस तापक्रम मापन गरिएको छ । यता लगातार चिसो बढेका कारण चितवनको नारायणगढ तथा भरतपुरका बजार क्षेत्र सुनसान हुँदै गएका छन् । बजारमा आवतजावतमा समेत कमी देखिएको छ । ठाउँठाउँमा मानिसहरु जाडो छल्न आगो बालेर तापेको पाइन्थ्यो ।

चिसोकै कारण व्यापार व्यवसायमा समेत गिरावट आएको छ । जाडो बढेसँगै बजारमा आउने उपभोक्ताको कमीसँगै व्यापारमा गिरावट आएको व्यवसायीहरु बताउँछन् ।

‘बिहानैदेखि हुस्सु लागेको छ, मानिस नै बाहिर निस्कन कठिन देखियो’, भरतपुर केन्द्रीय बस ट्रमिनलमा चिया पसल राख्नुभएकी सुनिता महर्जनले भन्नुभयो । केही दिनदेखि व्यापारमा कमी आएको उहाँले बताउनुभयो । ‘यात्रुसमेत कम छन्, भएका पनि गाडीबाट बाहिर निस्कँदैनन्’, महर्जनले भन्नुभयो ।

चितवनमा सोमबार बिहानैदेखि बाक्लो हुस्सु लाग्नुका साथै घामसमेत देखिएन । जसका कारण यहाँको तापक्रम भारीमात्रामा गिरावट आएको हो ।

बाक्लो हुस्सुका कारण भरतपुर विमानस्थलमा नियमित उडानहरु रद्द भएका छन् । बाक्लो हुस्सु र ‘भिजिविलिटी’ कम भएका कारण उडान रद्द गर्नुपरेको भरतपुर विमानस्थलले जनाएको छ ।

मध्य तराईमा २३ को मृत्यु

यता छिमेकी जिल्ला नवलपरासी, मकवानपुरमा पनि अत्यधिक जाडोका कारण जनजीवन प्रभावित भएको छ । हिउँद लागेसँगै मध्य तराईका जिल्लामा देखिएको बाक्लो हुस्सु तथा शीतलहरका कारण एक महिनामा २३ जनाको मृत्यु भइसकेको छ ।

अत्यधिक चिसोकै कारण आइतबारमात्र बारामा दुई जनाको मृत्यु भएको थियो । योसँगै मृत्यु हुनेको संख्या २३ पुगेको हो ।

अत्यधिक जाडोका कारण मध्य तराईका बारा, पर्सा, रौटहटमा मानिसको मृत्यु भएको हो । जसमध्ये रौटहट जिल्लामा सबैभन्दा बढी १३ जनाको मृत्यु भएको छ ।

त्यस्तै बारा जिल्लामा छ, पर्सा जिल्लामा चार÷पाँच जनाको मृत्यु भएको सम्बन्धित जिल्लाका जिल्ला प्रहरी कार्यालयले जनाएका छन् । तीन दिनदेखि बाक्लो हुस्सुको कारण बाराको सिमरास्थित विमानस्थलका सम्पूर्ण उडानहरु रद्द भएको सिमरा विमानस्थलले जनाएको छ ।

यसैगरी काठमाडौंमा १५ वर्षयताकै सबैभन्दा कम तापक्रम मापन गरिएको छ । सोमबार बिहान काठमाडौंको न्यूनतम तापक्रम माइनस शूल्य दशमलब दुई डिग्री सेल्सियस मापन गरिएको मौसम पूर्वानुमान महाशाखा काठमाडौंले जनाएको छ ।

यसअघि १५ वर्ष पहिले काठमाडौंको न्यूनतम तापक्रम माइनस तीन डिग्री सेल्सियस मापन गरिएको थियो । यो तापक्रम अझै घट्ने मौसम पूर्वानुमान महाशाखाले जनाएको छ ।

नेपालको मध्य तराईमा जाडो छल्न आगो ताप्दै स्थानीयवासी ।