चितवनका युवा हेटौँडामा पक्राउ

भरतपुर । मोबाइलको चार्जरभित्र लागूऔषध लुकाएर ल्याउँदै गरेको अवस्थामा पश्चिम चितवन पर्साढापका एक युवा पक्राउ परेका छन् । वीरगन्जबाट काठमाडौं छुट्ने बसमा चितवन आइरहेका २२ वर्षीय रिखित गुरुङलाई प्रहरीले मकवानपुरको रातमाटे चेकपोष्टमा आइतबार राति पक्राउ गरेको हो ।

बसलाई चेकजाँच गर्नेक्रममा बसभित्र रहेका गुरुङको हाउभाउप्रति शंका लागेर खानतलासी गर्दा उनी पक्राउ परेको मकवानपुर प्रहरीले जानकारी दिएको छ । गुरुङको साथबाट २० ग्राम खैरो हेरोइन बरामद भएको छ । उनको मोबाइलको चार्जरको नट खोलेर हेर्दा प्रहरीले हेरोइन फेला पारेको थियो ।

गुरुङलाई एक महिना हिरासतमा राखिने र त्यसपछि अदालतको आदेशअनुसार कारबाही अघि बढाइने प्रहरीले बताएको छ ।