‘संविधान निर्माणमा आशंका’

भरतपुर । नेपाल मजदुर किसान पार्टी चितवनले प्रमुख जिल्ला अधिकारीमार्फत संविधान सभाका अध्यक्षलाई ज्ञापनपत्र बुझाएको छ ।
ज्ञापनपत्रमा दुई वर्षभित्र निर्माण गरी सक्नुपर्ने संविधान चार वर्षमा पनि जनताले पाउनेबारे आशंका उत्पन्न भएको कुरा उल्लेख छ । ज्ञापनपत्रमा भनिएको छ, ‘संविधान सभामा धेरै संख्यामा प्रतिनिधित्व गरेको माओवादी, नेपाली काँग्रेस, एमाले आफै संविधान निर्माणप्रति गंभीर छैनन्, नेपाल मजदुर किसान पार्टी संविधान सभामा प्रतिनिधित्व गरेका शासक दलहरुबाट भइरहेको गैर जिम्मेवारीपूर्ण क्रियाकलापप्रति गम्भीर असहमति व्यक्त गर्दछ ।’
मजदुर किसान पार्टी जातीयताको आधारमा प्रदेश निर्माण गर्ने पक्षमा रहेको छैन । प्रत्यक्ष निर्वाचित राष्ट्रपति र सांसदहरु मन्त्री बन्न नपाउने व्यवस्थासहित प्राकृतिक स्रोत र साधनहरुको संतुलित वितरण हुने गरी १४ प्रदेश बनाउनुपर्नेमा मजदुर किसान पार्टीले जोड दिएको छ ।