चितवनमा सेनाद्वारा महाविद्यालय सञ्चालन

 राष्ट्रसेवक नागरिक उत्पादन गर्ने उद्देश्य ः प्रधानसेनापति

चैनपुर । नेपाली सेनाले पूर्वी चितवनको चैनपुरमा स्थापना गरेको सैनिक आवासीय महाविद्यालय मंगलबारबाट औपचारिक रुपमा सञ्चालनमा आएको छ ।
नेपाली सेनाका प्रधानसेनापति छत्रमानसिंह गुरुङले झण्डोत्तोलन गरी महाविद्यालयको उद्घाटन गर्नुभएको छ । नेपाली सेनाको कल्याणकारी योजना निर्देशनालयको कल्याणकारी कोषअन्तर्गत छैटौं विद्यालयको रुपमा सो विद्यालय स्थापना गरी सञ्चालन गरिएको हो ।
विद्यालय उद्घाटनका अवसरमा आयोजित समारोहलाई सम्बोधन गर्दै प्रधानसेनापति गुरुङले अनुशासित नागरिक उत्पादनको लागि नेपाली सेनाले शैक्षिक क्षेत्रमा लगानी गरेको बताउनुभयो । उहा“ले गुणस्तरीय शिक्षा प्रदान गरी राष्ट्रसेवक नागरिक उत्पादन गर्न नेपाली सेनाले महाविद्यालयलाई पा“चै विकास क्षेत्रमा सञ्चालन गर्ने योजनामा रहेको बताउनुभयो ।
नेपाली सेनाको इमान्दार र अनुशासित नागरिक उत्पादन गर्ने योजनाअनुरुप सैनिक महाविद्यालयको अवधारण ल्याएको भन्दै सेनापति गुरुङले एसएलसी परीक्षामा सैनिक विद्यालयको नतिजा राष्ट्रियस्तरमै उत्कृष्ट रहेको बताउनु भयो । सैनिक विद्यालयको नतिजा विद्यार्थीले अध्ययन सकेर देशको सेवामा सर्मपित भएपछि देखिने सेनापति गुरुङको भनाइ थियो ।
कार्यक्रममा सैनिक विद्यालय सञ्चालन समितिका अध्यक्ष तथा उपरथी राजेन्द्र क्षेत्रीले गुणस्तरीय शिक्षा प्रदान गरी योग्य नागरिक उत्पादन गर्ने उद्देश्यले चितवनमा मध्यमाञ्चलस्तरको महाविद्यालय सञ्चालन गरिएको बताउनुभयो । सो महाविद्यालयमा नेपाली सेनाका बहालवाला र भूतपूर्व सैनिक तथा गैरसैनिकका छोराछोरी पढ्न पाउने प्रिन्सिपल विमलकुमार क्षेत्रीले जानकारी दिनुभयो ।
बहालवाला र भूतपूर्व सैनिकका ६० प्रतिशत र गैरसैनिकका ४० प्रतिशत  छोराछोरी पढ्न पाउने नेपाली सेनाको निर्देशिकाअनुसार सोहीबमोजिम भर्ना लिइएको प्रिन्सिपल क्षेत्रीले जानकारी दिनुभयो । महाविद्यालयमा यो वर्ष कक्षा ६ मा ८० जना छात्र र ४० जना छात्रा गरी १२० जना प्रतिस्पर्धाका आधारमा भर्ना लिइएको उहा“ले जानकारी दिनुभयो ।
सैनिकतर्फ अधिकृतका छोराछोरीहरु ६ जना, पदिकका ३१ जना र अन्य दर्जाका ४२ जना गरी ७९ जना तथा गैरसैनिकतर्फ २९ जना छात्र र १२ जना छात्रा गरी ४१ जनाले महाविद्यालयमा अध्ययन गर्ने प्रिन्सिपल क्षेत्रीले बताउनुभयो । आगामी शैक्षिकसत्रमा अन्य कक्षा थपिँदैै जाने उहा“ले बताउनुभयो ।
शैक्षिकसत्र सुरू भएको तीन महिनापछि सुरू भएको सो महाविद्यालयले चार्डपर्व र जाडो बिदा कटौती गरी कोर्ष सक्ने योजना बनाएको प्रिन्सिपल क्षेत्रीले जानकारी दिनुभयो । विद्यार्थीमा अंग्रेजी भाषाको ज्ञानलाई निखार गर्ने उद्देश्यले अंग्रेजी भाषा प्रयोगशालाको स्थापना तथा खेलकुद र संगीतका कक्षाहरु पनि सञ्चालन गरिने उहाँले बताउनुभयो ।
विद्यार्थीहरुको शैक्षिक विकासको लागि भौतिक पूर्वाधारलाई विद्यार्थीमैत्री बनाउने योजना रहेको उहा“को भनाइ थियो । १० बिघा क्षेत्रफलमा फैलिएको तत्कालीन होलिल्याण्ड बोर्डिङ ईंङलिश स्कुल रहेको ठा“उमा सो विद्यालय सञ्चालन गरिएको हो ।
द्वन्द्वकालमा माओवादीका कारण होलिल्याण्ड बन्द भएपछि सो स्थानमा मेडिकल कलेज खोल्नका लागि संरचना निर्माण गरिएको थियो । मेडिकल कलेज सञ्चालन हुन नसकेपनि अस्पतालका रुपमा सेवा सुरू गरिएको थियो । पछि सो अस्पताल पनि बन्द भएको थियो ।
नेपाली सेनाको कल्याणकारी कोषको रकम राखिएको नेपाल विकास बैंक लिलाम भएपछि सोही बैंकले लगानी गरेको अस्पतालको सम्पत्ति नेपाली सेनाले झण्डै ६ महिनाअघि लिलाम प्रक्रियाबाट लिएर विद्यालय सञ्चालन गरेको हो ।
यसअघि शैक्षिक गुठीका रुपमा नेपाली सेनाले भक्तपुरको सालघारी, पोखराको फूलबारी, सुनसरीको धरान, सुर्खेत, कैलालीको टेघरीमा महाविद्यालय सञ्चालन गरिसकेको छ ।