जिविसको अन्ठान्नब्बे लाख रकम फ्रिज

विधुर ढकाल

भरतपुर । आर्थिक वर्ष २०६८÷०६९ मा चितवन जिल्लामा विभिन्न योजनाका गरी करिब ९८ लाख रुपैयाँ फ्रिज भएको छ । जिल्ला विकास समिति चितवनअन्तर्गत खर्च हुनुपर्ने उक्त रकम कार्य सम्पन्न हुन नसक्दा फ्रिज भएको समितिको कार्यालयले जनाएको छ ।
जसअन्तर्गत कुल ९७ लाख ५७ हजार ८३३ रुपैयाँमध्ये सामाजिक सुरक्षा भत्ताको ४४ लाख ७१ हजार ६०० रुपैयाँ फ्रिज भएको स्थानीय विकास अधिकारी बन्धुप्रसाद बास्तोलाले चितवन पोष्टलाई जानकारी दिनुभयो ।
केन्द्रले अघिल्लो आर्थिक वर्षका आधारमा रकम पठाएकोमा कतिपय वृद्धवृद्धाको मृत्यु भएको तथा कतिपय बसाइँ सराइ गरेर अन्यत्र गएका कारण उक्त रकम फ्रिज भएको उहाँले बताउनुभयो । ‘गत आर्थिक वर्षमा अधिक सामाजिक सुरक्षा भत्ता फ्रिज भएको छ । त्यसपछि स्थानीयरुपमा उठ्नुपर्ने राजस्व संकलनमा कमी आउँदा स्थानीयतहमा सञ्चालन हुनुपर्ने योजना सम्पन्न गर्न सकिएन्’, स्थानीय विकास अधिकारी बास्तोलाले भन्नुभयो ।
त्यस्तै केन्द्रीय योजनामा परेको सडक निर्माण सम्पन्न हुन नसक्दा १७ लाख ८० हजार रुपैयाँसमेत फिर्ता गएको उहाँले जानकारी दिनुभयो । ‘केन्द्रीय योजनामा १४ वटा सडक परेपनि दुईवटा सडकको काम सम्पन्न हुन सकेनन्’, बास्तोलाले भन्नुभयो । केन्द्रीय योजनामा परेको गीतानगर–पटिहानी जोड्ने सडक कालोपत्रो सम्पन्न हुन नसकेको उहाँको भनाइ छ ।
त्यस्तै जिल्लामा जनसहभागिताअन्तर्गत सञ्चालनमा आएका दुईवटा सडक योजनासमेत सम्पन्न हुन नसकेको जिल्ला विकास समिति योजना शाखाले जानकारी दिएको । यो योजनाअन्तर्गत काउले सडक र गीतानगर–चनौली सडक सम्पन्न नभएको शाखाले जनाएको छ ।
उपभोक्ता समितिले योजना बनाएर कामको सम्झौता भएपनि जेठ मसान्तसम्म सम्पन्न गरिसक्नुपर्ने काम असार मसान्तसम्म पनि सम्पन्न गर्न नसक्दा रकम फ्रिज भएको स्थानीय विकास अधिकारी बास्तोलाले बताउनुभयो । जिल्लामा यो शीर्षकमा विनियोजन भएको १४ लाख ६२ हजार ८६५ रुपैयाँ रकम फ्रिज भएको छ ।
जिल्लामा स्थानीयको माग बढी मात्रामा सडक निर्माणमा रहेको जिविसले जनाएको छ । गत आर्थिक वर्षमा एक करोड रुपैयाँभन्दा माथिका ६ वटा सडक योजना सम्पन्न भएको र चारवटा झोलुङ्गे पुल निर्माण भएको योजना शाखाले जनाएको छ । यसका अलावा जिल्लामा निर्वाचन क्षेत्र विकास कोषअन्तर्गतको पाँच लाख २३ हजार रुपैयाँ फ्रिज भएको छ ।
समग्रमा हेर्दा जिल्लामा योजना सफल भएको स्थानीय विकास अधिकारी बास्तोलाले बताउनुभयो । ‘सबैलाई हेर्दा आर्थिक वर्ष २०६८÷०६९ मा सञ्चालनमा रहेका योजनाहरु सफल भएको मान्नु पर्दछ, बढी रकम सामाजिक सुरक्षा भत्ताको फ्रिज भएको हो । जुन योजनाअन्तर्गतको होइन’, उहाँले भन्नुभयो ।
जिल्लामा कुल स्वीकृत बजेटमा ८३ दशमलब ९१ प्रतिशत प्रगति भएको जिविसले दिएको तथ्याङ्कमा उल्लेख छ । गत आर्थिक वर्षमा कुल एक अर्ब ४७ करोड ६५ हजार ६०७ रुपैयाँमध्ये एक अर्ब दुई करोड ३९ लाख १० हजार ६१९ रुपैयाँ खर्च भएको हो ।