रामपुर क्याम्पसमा दस दिनदेखि तालाबन्दी

रामपुर । करारमा नियुक्ति गर्नुपर्ने माग राखेर आंशिक प्रध्यापकहरुले रामपुर क्याम्पसमा असार २५ गते गरेको तालाबन्दी अझै खुलेको छैन । जसका कारण क्याम्पसमा यस शैक्षिकसत्रको पठनपाठन सुरू हुन सकेको छैन ।
तालाबन्दी भएपनि संघर्षरत प्रध्यापकहरुले परीक्षा सञ्चालनमा अवरोध गरेका थिएनन् । सो क्याम्पसमा पशु विज्ञानतर्फ २२५ जनासहित लगभग एक हजार जना विद्यार्थी अध्ययन गर्छन् । क्याम्पसमा कृषि तथा पशु विज्ञानमा स्नातकदेखि विद्यावारिधिसम्म अध्ययन हुन्छ ।
‘तीन महिनाअघि संघर्ष समिति बनाएर प्रशासनसमक्ष पटकपटक कुरा राख्यौं । सुनुवाई नभएपछि असार २५ गते डिन र क्याम्पस प्रमुखको कार्यकक्षमा ताला लगाएको हौं’, संघर्ष समितिका संयोजक नवीनबाबु खनालले भन्नुभयो ।
रामपुर क्याम्पसमा हाल १३ जना आंशिक प्राध्यापक छन् । उनीहरु दुई वर्षअघि नियुक्त भएका हुन् । एक पटक सात जना र अर्को पटक छ जना गरेर क्याम्पसले उनीहरुलाई राखेको हो । ‘हप्तामा एउटा पिरियडभन्दा बढी पढाउन पाइँदैन । एक पिरियड पढाएको डेढ सय रुपैयाँ पाइन्छ, यसरी कसरी चल्छ र त्यसैले करारमा नियुक्ति दिन माग गरेका हौं’, संघर्ष समितिका संयोजक खनालले भन्नुभयो ।
क्याम्पसले भेटेरिनरी संकायतर्फ थप एकजना आंशिक प्राध्यापक राख्न छनौट प्रक्रियाअगाडि बढाएपछि तालाबन्दी भएको थियो । जसका कारण अन्तरवार्ता स्थगित भएको छ ।
‘हामी पुराना आंशिक प्राध्यापकहरुको समस्या यथावत् रहेको अवस्थामा थप नयाँ राख्न प्रक्रियाअगाडी बढाएर अन्तरवार्ताको मितिसमेत तोकिएको थियो । हामीले तालाबन्दी गरेपछि अन्तरवार्ता रोकिएको छ । अब हामीलाई करारमा नराख्दासम्म ताला खुल्दैन’, संयोजक खनालको भनाइ छ । क्याम्पसमा अझै ३६ जना प्राध्यापकको दरबन्दी खाली छ । केही प्रध्यापकहरु अध्ययन बिदामा बसेका छन् ।
‘क्याम्पसमा प्राध्यापकहरु चाहिएको छ । त्यसैले हामीलाई करारमा राख्न आग्रह गरेका हौं’, खनालको जिकिर छ । रामपुर क्याम्पसलाई त्रिभुवन विश्वविद्यालयले २० वर्षअघि तय गरेको प्राध्यापक संख्या हाल अपुग हुने भएकाले आफूहरुलाई करारमा राख्नुपर्ने आंशिक प्राध्यापकहरुको अडान छ । यो विषयमा डिनसँग दुई पटक वार्ता भएको छ ।
‘त्रिभुवन विश्वविद्यालयले करारमा प्राध्यापक राख्ने हो भने तलब आफँै खुवाउन भनेको छ । यहाँ खुवाउन सक्ने स्रोत छैन । त्रिविले स्वीकृत नदिएकाले नै उहाँहरुलाई करारमा नियुक्ति दिन नसकेको हो’, क्याम्पसका डिन प्रा.डा सुन्दरमान श्रेष्ठले भन्नुभयो ।
उता ४५ दिन बिदा भएर क्याम्पस खुलेको बेलामा पढ्न नपाएको भनेर विद्यार्थी संगठनहरुले भने बन्दको विरोध गरेका छन् ।