एनपीआईको बसमा आगजनी र तोडफोड

एनपीआईमा तोडफोड भएपछि त्यसको विरोधमा चौबीसकोठीमा चक्काजाम गर्दै विद्यार्थीहरु ।

भरतपुर । नेपाल पोलिटेक्निक इन्स्टिच्युट भरतपुरमा मंगलबार बिहान अज्ञात समूहले तोडफोड तथा आगजनी गरेपछि विद्यार्थीहरुले प्रतिकार गरी लखेटेका छन् । तीनवटा मोटरसाइकलमा आएका ६ जनाले पेट्रोल छर्केर कलेजको गाडीमा आगजनी र कम्प्युटर एवम् झ्यालमा तोडफोड गर्न थालेपछि विद्यार्थीहरु प्रतिकारमा उत्रिएका थिए ।

सोक्रममा विद्यार्थीहरुले आगजनी गर्न आएको समूहले प्रयोग गरेको ना २० प १८०५ नम्बरको पल्सर मोटरसाइकल जलाइदिएका छन् । विद्यार्थीहरु प्रतिकारमा उत्रिएपछि उनीहरु मोटरसाइकल छाडेर भागेका थिए ।
अज्ञात समूहको अगजनीबाट कलेजको ना १ क २६१६ नम्बरको गाडीमा क्षति पुगेको छ । गाडीमा लागेको आगो विद्यार्थीहरुले निभाएका थिए । कलेजको क्षतिको विवरण नआइसकेको जिल्ला प्रहरी कार्यालय चितवनले जनाएको छ ।
कर्मचारीहरु कार्यकक्षमा नै रहेको बेला उनीहरुले गमला उचालेर कम्प्युटर, पार्टेशन र झ्यालमा हानेको कलेजका प्रशासकीय अधिकृत शिव सुवेदीले बताउनुभयो ।
प्रमुख जिल्ला अधिकारी हिमनाथ दवाडीले आगजनी र तोडफोड गर्ने समूहको खोजिकार्य भइरहेको बताउनुभयो । झण्डै एक महिनाअघि सोही कलेजको भरतपुरको भोजाडमा रहेको मुख्य ब्लकमा अनेरास्ववियु क्रान्तिकारीका विद्यार्थीहरुले तोडफोड गर्दा १० लाख रुपैयाँभन्दा बढीको क्षति भएको थियो ।
कलेजमा एचए, ल्याब, सीएमए, अनमिलगायतका प्राविधिक शिक्षाको पढाइ हँुदै आएको छ ।
यसैबीच कलेजमा भएको तोडफोडको विरोधमा विद्यार्थीहरुले मंगलबार बिहान केही समय भरतपुरको चौबीसकोठीमा चक्काजाम गरेका थिए ।
यसैबीच नेविसंघ नेपाल पोलिटेक्निक इकाइ समिति भरतपुरले २४ घण्टाभित्र दोषीलाई कानुनी दायरामा ल्याउन माग गरेको छ । उपसभापति गणेशप्रसाद रिजालद्वारा जारी विज्ञप्तिमा शिक्षा क्षेत्रको सुरक्षाको ग्यारेन्टी गर्न माग गरिएको छ ।
त्यस्तै क्यान्सर अस्पताल भरतपुर कम्पाउण्डभित्र सञ्चालित इशा मेडिकल हलमा मंगलबार बिहान तोडफोड भएको छ ।
तोडफोडको नेपाल औषधि व्यवसायी संघ जिल्ला उपशाखा चितवनले विरोध गरेको छ । अध्यक्ष हिरामान महर्जनले निकालेको विज्ञप्तिमा क्षतिपूर्तिसहित दोषीमाथि कारबाहीको माग गरिएको छ ।