किसान महासंघले कृषि अभियान संचालन गर्ने

भरतपुर । अखिल नेपाल किसान महासंघले कृषि अभियान सञ्चालन गर्ने भएको छ । शनिबार भरपुरमा आयोजित अन्तक्रिया कार्यक्रममा यस्ता जानकारी दिइएको हो ।
नेकपा एमाले प्रशिक्षण विभाग तथा अखिल नेपाल किसान महासंघले ‘नया नेपाल निर्माणका लागी जनस्तरमा नया कृषि अभियान’ भन्ने मुल नाराका साथ अभियान संचालन गर्न लागेको हो ।
देशका ५१ वटा जिल्लामा संचालन गरिने अभियान अन्तर्गत कृषि परियोजनाहरुका साथ कार्यक्रम संचालन गरिने बताएको छ । महासंघले अभियानको परियोजनाहरु, केन्द्रीय नमुना कृषि फर्म तथा तालिम केन्द्र स्थापना, जिल्ला स्तरीय सामुहिक नमुना कृषि फर्म निर्माण, प्राङगरिक कृषि उत्पादक सहकारी गठन, किसान जलबिद्युत सहकारी गठन, जेष्ठ नागरिक कम्युन स्थापना लगायतका कार्यक्रमहरु तयार गरिएको अखिल नेपाल किसान महासंघको उपाध्यक्ष केशबलाल श्रेष्ठले जानाकारी दिनुभयो ।
अभियान सञ्चालन हुने जिल्लाहरुमा महासंघले आफु निकटका २३ वटा बिषयगत संघहरुसंगको सहकार्यमा जिल्लामा कृषि सम्बन्धी क्रियाकलापहरु संचालन गरिने योजना बनाएको उपाध्यक्ष श्रेष्ठले बताउनुभयो । ‘खेतीयोग्य जमिनलाई भरपुर प्रयोग गरी किसानको आम्दानीको स्रोतको रुपमा विकास गर्ने योजनामा अभियान संचालन गरिएको हो’, उपाध्यक्ष श्रेष्ठले भन्नुभयो ।
त्यस्तै कृषि तथा  बन विज्ञान विश्वविद्यालयका उपकुलपति एवम् कार्यक्रमका प्रमुख कैलाशनाथ प्याकुरेलले नेपालमा यस अघि घोषणा भएको भुमिसुधार नितीको बैज्ञानिक बिष्लेषण गरिनुपर्ने बताउनुभयो । साथै उहा“ले कुनै समुह तथा संघ संस्थाले गर्न खोजेको राष्ट्रियहितका कार्यहरुमा सरकारी उपस्थिति हुनुपर्नेमा जोड दिनुभयो ।
कार्यक्रममा बोल्दै जिल्ला कृषि विकास कार्यालयका प्रमुख जगन्नाथ तिवारीले कृषि क्षेत्रलाई विकास गर्ने योजना हो भने राष्ट्रिय बजेटमा प्राथामिकतामा राखिनुपर्नेे बताउनुभयो । कार्यक्रममा प्राध्यापक डा. माधव श्रेष्ठ, उद्योग बाणिज्य संघ चितवनका अध्यक्ष डा. तिलचन्द्र भट्टराई, उद्योगी कल्याणी मिश्र लगायतले बोल्नुभएको थियो ।
महासंघका उपाध्यक्ष श्रेष्ठको अध्यक्षतामा सम्पन्न भएको हो । महासंघले ५१ जिल्लाका करिब ३० हजार किसानहरुलाई अभियानका क्रममा सक्रिय बनाउने बताएको छ ।