सेतीमा भिषण बाढी, २० घर डुबानमा

unn.com.np

पोखरा, असार २८– बुधवारराती पोखरा आसपासमा भिषण वर्षापछि सेती नदीमा बाढी आएको छ । नदीमा मध्यराती एक्कासी पानीको वहाव बढ्दा रामघाटको बगर क्षेत्र वरपरका २० भन्दा धेरै घरहरु डुवानमा परेका छन् । बाढीले बस्ती डुबाएपछि, त्यहाँका वासिन्दाले घरका छतहरुमा बसेर ज्यान जोगाएका छन् ।

रामघाट क्षेत्रमा राती ठूलो ताल बनेको र जिल्ला प्रहरी कार्यालयबाट गएको प्रहरी टोली र सशस्त्र प्रहरी बल कालिका गणका जवानहरुले लेकसाईडबाट डुंगा मगाई घरका छतमा बसेकाहरुलाई उद्दार गरेका हुन् ।

बाढीका कारण केही घरपालुवा पशुपंक्षी मरेको भएपनि कुनै मानवीय क्षति नभएको जिल्ला प्रहरी कार्यालय कास्कीले जानकारी दिएको छ । अहिले सेतीमा पानीको बहाब घट्दै गएको छ । पोखरामा बुधवार साँझ ७ बजे पछिको १२ घण्टाको अवधिमा मात्रै ९१.८० मिलिमिटर पानी परेको छ ।