अपराधजन्य समाचारप्रति पाठकको रुचि बढी

विधुर ढकाल

नारायणगढ । देशको संक्रमणकालका कारण अपराधजन्य घटनाहरुको वृद्धि भएसँगै आमसञ्चारका प्रयोगकर्ताहरु पनि अपराधजन्य विषयवस्तु समावेश गरिएका समाचारहरुप्रति रुचि राख्ने गरेको चितवन पोष्टले गरेको पाठक सर्वक्षणले देखाएको छ ।
चितवनको नारायणगढ बजारआसपास भेटिएका पाठकहरुसँग लिइएको मतमा पत्रपत्रिकामा ५० प्रतिशत पाठकहरुले अपराधजन्य समाचारप्रति रुचि देखाएका हुन् । यससँगै पाठकहरु राजनीतिक समाचारहरु पढ्न रुचि राख्ने गरेको सर्वेक्षणले देखाएको छ ।
पाठकको मतअनुसार कुल सय प्रतिशतको ५० प्रतिशतले आपराधिक घटनासँग सम्बन्धित समाचारहरु पढ्ने गरेको बताएका छन् । समाजमा आपराधिक घटनाहरुले विकृति फैलाएको भन्दै यस्ता समाचारले आपराधिक घटनाहरुलाई नै न्यूनीकरण गर्न सहयोग गर्ने पाठकहरु बताउँछन् ।
‘आपराधिक समाचारहरु संकलन र लेखनमा जोखिम भएपनि यस्ता समाचारहरुले समाजमा विकृति विसंगति न्यून गर्न सहयोग पु¥याउने हुँदा आपराधिक घटनासँग सम्बन्धित समाचारप्रति बढी रुचि जान्छ’, सर्वेक्षणमा सहभागी भरतपुर–१० का विद्यार्थी राजेन्द्र भुषालले भने । समाजलाई अपराधबाट मुक्त पार्न सञ्चार जगतले आपराधिक चिन्तनको भण्डाफोर गर्नुपर्ने आमसञ्चारका विद्यार्थी भुषालको भनाइ छ ।
अपराधजन्य समाचारसँगै पाठकहरुले राजनीतिक समाचारप्रति रुचि देखाएका छन् । देशको राजनीतिक बाटो कता जाँदैछ भन्नेतर्फ पाठकहरुको धारणा सञ्चार जगतले निर्माण गर्ने काम गरेका छन् । यो विषयमा कुल ३० प्रतिशत पाठकहरुले रुचि देखाएका छन् । उनीहरु देशको राजनीतिक परिवर्तनमा सञ्चार जगतले मह¤वपूर्ण भूमिका खेल्ने गरेका बताउँछन् ।
त्यस्तै सामान्य समाचारप्रति १० र मनोरञ्जन खेलकुदलगायत अन्य समाचारप्रति १० प्रतिशत पाठकले रुचि व्यक्त गरेका छन् ।
यता पत्रिकामा प्रकाशित लेखहरु भने पाठकहरुले आफ्नो अभिरुचिअनुरुपका भएमा पढ्ने गरेको बताएका छन् । सर्वेक्षणमा सहभागी ४० प्रतिशत पाठकहरुले रुचिअनुरुपका लेखहरु प्रकाशित भए पढ्ने जनाएका छन् । त्यस्तै ३० प्रतिशत पाठकहरुले नियमित र ३० प्रतिशतले कहिलेकाँही लेखहरु पढ्ने गरेको सर्वेक्षणले देखाएको छ ।
त्यसैगरी पत्रिकाको सम्पादकीयमा पाठकहरुको रुचि विषय अनुरुपको रहने गरेको पाइयो । पाठकहरु विषयअनुरुप सम्पादकीयमा आँखा लगाउने बताउँछन् । सर्वेक्षणमा सहभागी पाठकहरुमध्ये ७० प्रतिशतले विषय हेरेर सम्पादकीय पढ्ने बताएका छन् । १० प्रतिशतले नियमित तथा १० प्रतिशतले कहिलेकाँही पढ्ने तथा १० प्रतिशतले सम्पादकीय नै नपढ्ने जनाएका छन् ।
सर्वेक्षणमा सोधिएको अर्काे प्रश्न सम्पादकलाई लेखिने पत्रका बारेमा ४० प्रतिशतले जानकारी भएको बताएका छन् । त्यस्तै ३० प्रतिशतले यसको बारेमा केही मात्रामा जानकारी भएको र २० प्रतिशतले जानकारी नै नभएको जनाएका छन् । त्यस्तै सहभागीमध्ये १० प्रतिशतले यसको बारेमा भन्न नसक्ने बताएका छन् ।