पत्रकारमाथि आक्रमणको विरोधमा प्रदर्शन

नारायणगढ । नेपाल पत्रकार महासंघ चितवन शाखाले स्वतन्त्र पत्रकार संघ नेपालका केन्द्रीय सदस्य एवम् चितवन पोष्ट राष्ट्रिय दैनिकका पत्रकार विधुर ढकालको आक्रमण, तथा दैलेखका पत्रकार डेकेन्द्रराज थापा हत्याको अभियुक्तलाई कारबाही नगर्ने प्रधानमन्त्रीको भनाइको विरुद्धमा नारायणगढमा प्रदर्शन गरेको छ ।

चितवनका अधिकांश पत्रकारहरुको सहभागिता रहेको विरोध ¥यालीमा बोल्दै शाखा अध्यक्ष जनक अर्यालले ढकालमाथि कुटपिट गर्ने अपराधिलाई तत्काल नियन्त्रणमा लिई कारबाही गर्नुपर्ने माग गर्नुभयो ।

निष्पक्ष ढंगले कलम चलाउने एक जना पत्रकारमाथि आक्रमण गरिनु भनेको समग्र प्रेस स्वतन्त्रतामाथिकै आक्रमण भएको उहाँको भनाइ थियो । उहाँले पत्रकार थापाका हत्यारालाई सरकारले कारबाही नगरेको भन्दै कारबाहीको माग गर्नुभयो ।

‘तत्काल घटनाको निष्पक्ष छानविन गरेर दोषीलाई कारबाही गरिनु पर्दछ’, अध्यक्ष अर्यालले भन्नुभयो, ‘सरकार हत्यारालाई बचाउनतर्फ लागिरहेको छ ।’ सरकारले पत्रकारमाथि आक्रमण गर्नेलाई कारबाहीको दायरामा नल्याए पत्रकारहरुको आन्दोलनले नै सरकार ढाल्ने चेतावनीसमेत दिनुभयो ।

नरायणगढको लायन्सचोकबाट सुरू भएको विरोध¥याली पुलचोकमा पुगेर कोणसभामा परिणत भएको थियो । ¥यालीमा पत्रकारहरुले आक्रमणकारीलाई कारबाही गर, प्रेस स्वतन्त्रता कायम गर, हत्यारो सरकार मुर्दावादलगायतका नारा लगाएका थिए ।

भरतपुरबाट सहिदचोकस्थित कार्यालयतर्फ पैदल आउँदै गर्दा पत्रकार ढकालमाथि लायन्सचोक कामना बैंकअगाडि तीन जना युवाले आक्रमण गरेका थिए ।

ढकालमाथि कुटपिट गर्नेहरुको खोजी भइरहेको भन्दै जिल्ला प्रहरी प्रमुख प्रहरी उपरीक्षक दीपककुमार थापाले उनीहरुलाई छिट्टै नै नियन्त्रणमा लिई कारबाही गरिने बताउनुभएको छ ।