अराजक घटनाक्रमहरुको पुनरावृत्ति

मुलुक अहिले जंगली शासनबाट चलिरहेको अनुभव आमनागरिकहरुले गरिरहेका छन् । स्वयं प्रधानमन्त्री पत्रकारका हत्यारालाई छुटाउन सक्रिय भएपछि अपराधी मनोवृत्तिका व्यक्तिहरुको मनोबल अचानक बढ्न गएको छ । चितवन जिल्लामा पनि गत मंगलबार साँझ एक जना युवा पत्रकार विधुर ढकालले आफ्नो कुनै गल्ती नहुँदा पनि कुटाइ खानु परेको छ । चितवन पोष्ट दैनिकका संवाददाता आफूलाई के कारणले आक्रमण गरिएको हो भन्ने विषयमा अझै पनि अनभिज्ञ छन् । आफूलाई पत्रिकामा प्रकाशित कुनै समाचार सामग्रीप्रति आपत्ति छ भने त्यसको समाधान गर्न कानुनका अनेक बाटाहरु छन् । तर वैधानिक र विधिसम्मत बाटो अपनाएर भौतिक आक्रमणमा उत्रने प्रवृत्ति र संस्कृतिले हाम्रो समाज कुन दिशातर्फ उन्मुख हुँदैछ भन्ने प्रश्न खडा गरेको छ ।

समाजको यौटा हिस्सा हिंसा र अराजक गतिविधिमा विश्वास गर्दै त्यहीअनुरुप विभिन्न क्रियाकलापहरु सञ्चालन गर्दै आएको छ । समयमै देशको कानुनले दण्डित नगर्ने हो भने उनीहरुको अराजक र छाडा क्रियाकलापहरुको पुनरावृत्ति भइरहने गर्दछ । तसर्थ जानीजानी गल्ती गर्नेहरु र भौतिक आक्रमणमा उत्रिने असामाजिक त¤वलाई समयमै नियन्त्रणमा लिएर अपराधअनुसारको सजाय दिन अधिकार प्राप्त निकायले विशेष सक्रियता देखाउनु आवश्यक देखिएको छ । गुन्डागर्दी नियन्त्रण गरेर चितवनमा शान्ति सुरक्षाको स्थिति सुदृढ बनाउन प्रहरी प्रमुखले तत्काल ठोस कदम चाल्नु आवश्यक देखिएको छ ।

एक जना पत्रकार कुटिएको घटना समाजका अन्य वर्गका लागि त्यति ठूलो कुरा नलाग्न पनि सक्छ । गल्ती गरेको थियो होला र कुटाइ खायो होला भन्ने आमधारणा रहने गर्दछ । गल्ती नै नगरी गुन्डाको हातबाट स्वाभिमानी पत्रकार कुटिनुपर्छ भने त्यसलाई अवश्य पनि शुभ संकेत मान्न सकिँदैन । सुरक्षा निकायले घटनाको वास्तविकता छानबिन गरेर अपराधीलाई तत्काल कानुनअनुसार सजाय दिन पछि पर्नुहुँदैन । यदि अहिले पत्रकार कुटिएको घटनाका दोषीलाई कारबाही नगर्ने हो भने भोलि जतिखेर जोसुकै व्यक्ति पनि व्यर्थमा कुटिन सक्छ भन्ने कुरा हामीले बिर्सनुहुँदैन ।

चितवनका प्रहरी उपरीक्षक दीपककुमार थापाले यहाँ पदभार ग्रहण गरेलगत्तै आफ्नो प्रमुख कार्यका रुपमा गुन्डागर्दी नियन्त्रण रहने प्रतिबद्धता व्यक्त गरेका थिए । उनले केही हदसम्म आफ्नो लक्ष्य पूरा गरेको अनुमान गरिएको छ । अझै गर्नुपर्ने काम धेरै बाँकी रहेको अवस्था छ र यतिखेर चितवन पोष्टका संवाददाता विधुर ढकाल मात्र नभएर सिंगो नेपाल पत्रकार महासंघ चितवन शाखा पत्रकार पिट्दै हिँड्ने गुन्डाहरुमाथि तत्काल कारबाही भएको हेर्न आतुर भएर बसेको छ । यो घटनामा प्रहरीले अहिलेसम्म सकारात्मक भूमिका निर्वाह गरिरहेको भए तापनि तीन जना आक्रमणकारीलाई कारबाही नभएसम्म राज्यको चौँथो अंगका रुपमा मर्यादित पत्रकारिता जगत्ले सुरक्षा निकायप्रति पूर्ण भरोसा गरिहाल्न मिल्दैन । निष्पक्ष न्यायको खोजीमा रहेका चितवनका पत्रकारहरु अहिले प्रहरी प्रमुखको कामभन्दा पनि परिणाम हेर्न चाहिरहेका छन् ।

चितवन पोष्ट दैनिकको सम्पादकियबाट साभार