प्रचण्ड र डा.भट्टराईको पुत्ला दहन

नारायणगढ । माओवादी जनसेनालाई नेपाली सेनामातहत लैजाने निर्णयलाई आत्मसमर्पणवादी निर्णयको संज्ञा दिँदै माओवादीभित्रको असन्तुष्ट वैद्य खेमाले बुधबार पार्टी अध्यक्ष पुष्पकमल दाहाल ‘प्रचण्ड’ तथा प्रधानमन्त्री डा.बाबुराम भट्टराईको पुत्ला जलाएको छ ।

नारायणगढको लायन्सचोकबाट पुत्लासहितको मसाल जुलुस पुलचोकमा पुगेर पुत्ला दहनपछि कोणसभामा परिणत भएको थियो । कोणसभालाई माओवादी जिल्ला सहइञ्चार्ज शोभा कट्टेलले प्रचण्ड र बाबुरामले आफूलाई गद्दार सावित गर्दै आत्मसमपर्णवादी ढङ्गले समायोजनको निर्णयमा सहमति जनाएको आरोप लगाउनुभयो । जनसंविधान निमार्णको मुखमा आएको अवस्थामा सेनाको आत्मसमपर्णवादी ढङ्गले समायोजन गरिनु जनसंविधान निर्माण नगर्ने सड्यन्त्र भएको उहाँको आरोप थियो । कार्यक्रममा माओवादी राज्य समिति सदस्य एवम् मजदुर फ्याक्सन इन्चार्ज घननाथ सापकोटाले सर्वहारावर्गको संविधान निर्माण नगर्ने षडयन्त्र भएको आरोप लगाउनुभायो । ¥यालीमा जनयुद्ध जारी छलगायत प्रचण्ड र बाबुराम भट्टराईविरुद्ध चर्का नारा लगाएका थिए । यसअघि बुधबार नै उनीहरुले बिहान १० बजेदेखि ११ बजेसम्म पुलचोकमा चक्काजाम गरेका थिए ।