देवघाटमा सुविधासम्पन्न धर्मशाला बन्दै

देवघाट । बर्सेनि लाखाँैको संख्यामा भक्तजनहरु पवित्र कालिगण्डकी नदीमा स्नान गर्न आउने भएपनि धर्मशालाको अभाव हुँदा समस्या झेल्दै आएका छन् । अब त्यो समस्या पनि बिस्तारै हट्दै जाने भएको छ । देवघाटको नदी किनारमा ४० कोठे पक्की धर्मशाला निर्माण हुने भएपछि समस्या हट्ने भएको हो ।
करिब चार करोड रुपैयाँको लागतमा निर्माण हुन लागेको धर्मशालामा एक हजार जना भक्तजनले एकै पटक सुविधा सम्पन्न आवासको सुविधा पाउने हरिकृतन वैद्धिक धर्मशाला निर्माण समितिका सचिव फूलनाथ निउरेले बताउनुभयो । ‘बर्सेनि माघ महिनामा नदीमा स्नान गर्न आउने भक्तजनले आवासको समस्या भोगेको गुनासो गरेकाले त्यसलाई समाधान गर्न स्थानीय र भक्तजनसँग आर्थिक सहयोग लिएर निर्माण थालेका हाँै’, उहाँले भन्नुभयो ।
धर्मशाला निर्माणका लागि समितिले २०६७ सालमा १०८ श्रीमद्भागवत महापुराणको आयोजना गरेर रकम संकलन गरेको थियो । उक्त रकमसँगै २०६८ सालमा वेदपुराण पाठ लगाएर आर्थिक संकलन गरेर सोही सालबाट निर्माण थालिएको धर्मशाला आगामी दुई वर्षभित्र आंशिक रुपमा सञ्चालनमा ल्याइने सचिव निउरेले बताउनुभयो ।
भवनको तीन तलामध्ये दोस्रो तलाको ढलान गर्न लागिएको छ । अहिलेसम्म करिब एक करोड २० लाख रुपैयाँ बराबरको काम सकिएको उहाँले जानकारी दिनुभयो । ‘आम भक्तजनबाट चन्दा संकलन गर्दै र करिब ४० लाख ऋण सहयोगमा अहिलेसम्मको काम सम्पन्न गरेका छौं’, निउरेले भन्नुभयो ।
धर्मशाला निर्माण सम्पन्न गर्न उहाँले सबैलाई आग्रह गर्नुभएको छ । अहिलेसम्म सरकारी निकायबाट सहयोग नपाएको निउरेको गुनासो छ । देवघाटमा स्नान गर्न नेपालका विभिन्न भागसँगै भारतबाट समेत भक्तजनहरु आउने गर्दछन् ।
उनीहरुका लागि सुरक्षित वासस्थान नहुँदा नारायणगढका होटेलहरुमा बस्नुपर्ने बाध्यता रहँदै आएको थियो । धर्मशाला निर्माण सम्पन्न भएपछि बिस्तारै यो समस्या हट्दै जानेमा स्थानीय विस्वस्त छन् ।
‘माघे संक्रान्तिको मेलाका बखत दर्शनार्थीहरुको वासस्थानको व्यवस्था नहुँदा बजार अव्यवस्थित बनेको थियो । धर्मशाला निर्माणपछि व्यवस्थित हुने आशा छ’, स्थानीय व्यवसायी पुरुषोत्तम कँडेलले भन्नुभयो ।