प्रधानमन्त्रीलाई मुलुकी ऐन उपहार

भरतपुर ।  मुलुकी ऐनकै धज्जी उडाउँदै दैलेखका पत्रकार डेकेन्द्रराज थापाको हत्यारालाई बचाउन खोज्ने प्रधानमन्त्री बाबुराम भट्टराईलाई सो ऐनको ज्ञान दिलाउन भन्दै चितवनबाट मुलुकी ऐन उपहार पठाइएको छ ।

भाँचिएको कलम, च्यातिएको नोट बुकसगँै नेपाल प्रेस युनियन चितवनले मुलुकी ऐनको किताब पनि प्रधानमन्त्रीलाई उपहार पठाइएको हो  । युनियनले जिल्ला प्रशासन कार्यालय चितवनमार्फत प्रधानमन्त्रीलाई सो उपहार आइतबार पठाइएको हो ।

प्रधानमन्त्रीलाई सम्वोधन गरिएको सो उपहार सहायक प्रमुख जिल्ला अधिकारी शिवराम गेलाललाई बुझाइएको थियो ।

प्रधानमन्त्रीले मुलुकी ऐन विपरीत गएर हत्याराको संरक्षण गर्न खोजेको भन्दै युनियनले उपहार पठाएको हो । सो अवसरमा बोल्दै युनियनका जिल्ला अध्यक्ष बसन्त पराजुलीले प्रधानमन्त्रीले मुलुकी ऐन नपढेको हँुदा सो ऐनका बारेमा जानकारी दिन ऐन नै उपहार दिएको बताउनुभयो ।

‘प्रधानमन्त्रीले ऐन नजानेर नै हत्यारालाई समेत उन्मुक्ति दिन खोजिरहेका छन’, उहाँले भन्नुभयो, ‘प्रधानमन्त्रीलाई ऐन पढ्न नै उपहार दिएको हो ।’

युनियनका मध्यमाञ्चल संयोजक दीपक आचार्यले दण्डहीनता, अराजकता र प्रेस स्वतन्त्रताका विरूद्धमा लाग्ने प्रधानमन्त्रीको पद च्यूत गर्नुपर्ने बताउनुभयो । उपहार बुझ्दै सहायक प्रमुख जिल्ला अधिकारी शिवराम गेलालले उपहारलाई सुरक्षित रुपमा प्रधानमन्त्रीको कार्यालय पुर्याउने प्रतिबद्धता व्यक्त गर्नुभयो ।

यसैगरी प्रेस युनियन मकवानपुरले जिल्ला प्रशासन कार्यालय मकवानपुरमा धर्ना र विरोध कार्यक्रम सम्पन्न गरेको छ ।