धादिङको कृष्णभीरमा अर्काे यात्रुबस दुर्घटना

बस त्रिशूलीमा खस्दा १७ को ज्यान गयो    

धादिङ । उदयपुरको कटारीबाट काठमाडांैका लागि छुटेको रात्रिबस धादिङ जिल्लाको धुषा गाविस–१ मा पर्ने पृथ्वीराजमार्गको कृष्णभीरबाट त्रिशुली नदीमा खस्दा १७ जनाको ज्यान गएको छ । एक बालकसहित छ जनाको घटनास्थलमै र चार जनाको उपचारका क्रममा ज्यान गएको हो भने सात जनाको शव प्रहरीले नदीमा डुबिरहेको बसबाट बाहिर निकालेको छ ।
उदयपुरबाट काठमाडौं आउँदै गरेको ना २ ख ४९५१ नम्बरको बस सोमबार बिहान ४ बजेतिर धादिङको धुषा गाविस वडा नम्बर १ मा पर्ने पृथ्वीराजमार्गको कृष्णभीरबाट दुई सय मिटर तल त्रिशुली नदीमा खस्दा सो दुर्घटना भएको हो । यसअघि आइतबार नवलपरासीको त्रिवेणिस्थित गण्डक नहरमा तीर्थयात्री बोकेको बस दुर्घटना हँुदा ४२ जनाले ज्यान गुमाएका थिए ।
प्रहरीका अनुसार कृष्णभीरको दुर्घटनामा ज्यान गुमाउनेहरुमा नुवाकोटका दीपकप्रसाद खनाल, उदयपुरका खोगबहादुर धमला र आर्टीलरी तालिम केन्द्र काठमाडांैका अमलदार सुकबहादुर कार्की, सिन्धुलीका २७ वर्षीय कोशिस घिमिरे, उदयपुरकी २१ वर्षीया रुकु मगर, अन्दाजी तीन वर्षीया एक बालिका रहेका छन् । उनीहरुको घटनास्थलमै ज्यान गएको थियो ।
उदयपुरका २२ वर्षीय छिपनारायण श्रेष्ठ, सिराहाका २८ वर्षीय मोहम्मद कलामुद्दिन शेष, नुवाकोटका नारायण अधिकारी, उदयपुरकै २२ वर्षीय सुरेन्द्र साह र धनुषाका २२ वर्षीय विनोद महरा रहेका छन् । उनीहरुको शव नदीबाट निकालिएको प्रहरीले जनाएको छ ।
त्रिशुली नदीमा हराइरहेका मध्ये सात जनाको शव प्रहरीले प्राविधिकहरुको सहयोगमा बसलाई हल्लाएर नदीबाट बाहिर निकालेको थियो । नदीबाट निकालिएका सात जनामध्ये ३० वर्ष जतिकी एक महिला र एक पुरूषको अझै सनाखत हुन सकेको छैन । 
दुर्घटनामा परी सिन्धुली निवासी एमाओवादीका राज्य समिति सदस्य दीपक चौधरी बेपत्ता छन् । एमाओवादीका कार्यकर्ताहरु दोस्रो डिभिजनका पूर्वकम्पनी कमाण्डर विनु वान्तवा राई, राजन बराइली,  जमुसेका पूर्वकम्पनी कमाण्डर मिरा कार्की दुर्घटनामा घाइते भएका छन् । उनीहरुले एमाओवादीको विस्तारित बैठकका लागि राजधानी जाँदै थिए ।
दुर्घटनामा घाइते भएकामध्ये १८ जनाको स्टार हस्पिटल काठमाडांैमा र अन्यको विभिन्न अस्पतालहरुमा उपचार भइरहेको छ । प्रहरीले घटनास्थलबाट ३० जनालाई जीवितै उद्धार गरी उपचारका लागि काठमाडांैतर्फ पठाएको जनाएको छ । 
घाइते भएका अन्य सर्वसाधरणमा भेषराज धमला, नर्बु तामाङ, सन्तु तामाङ, मिनुकुमारी बराईली, सतमा मगर, निराशा यादव (नाबालक), इन्द्रजित महरा, बुम्भलाल अधिकारी र सुवास रहेको प्रहरीले जनाएको छ ।
घटनास्थलमा राजमार्ग उद्धार स्वयम्सेवकको टोली, नेपाली सेना, जनपथ प्रहरी र सशस्त्र प्रहरीको टोलीले उद्धार गरेका थिए । लगातारको वर्षासँगै त्रिशूली नदीमा पानीको बहाव बढेका कारण उद्धार कार्यमा कठिनाइ भएको  इलाका प्रहरी कार्यालय गजुरीका प्रहरी निरीक्षक विनोद घिमिरेले बताउनुभयो । 
बेपत्ता हुनेको संख्या अझै बढ्न सक्ने अनुमान प्रहरीको छ । कटारीबाट ५२ जना यात्रुको चलानी लिएर हिँडेको बसले बीच बाटोमा समेत यात्रु चढाएकोले ६० जनाभन्दा बढी यात्रु बसमा सवार रहेको हुन सक्ने घाइतेहरुले बताएका छन् । बस दुर्घटनाको कारण खुल्न नसकेको इलाका प्रहरी कार्यालय गजुरीले जनाएको छ ।
यसअघि नयाँ वर्षको दिन पनि सोही स्थानमा भएको दुर्घटनामा चार जनाको ज्यान गएको थियो ।

ट्रिपर र बस जुध्दा तीनको मृत्यु

 कावासोती । पूर्वपश्चिम राजमार्गअन्तर्गत नवलपरासीको सुनवलमा सोमबार बिहान  बस र ट्रिपर एकापसमा ठक्कर खाँदा तीन जनाको मृत्यु भएको छ । ४५ जना घाइते भएका छन् । ट्रिपर चालकको घटनास्थलमै र बसमा सवार दुईको उपचारका क्रममा मृत्यु भएको नवलपरासी प्रहरीले जनाएको छ ।
दैलेखबाट काठमाडौँतर्फ जाँदै गरेको ना३ख ५०९० नम्बरको बस र विपरीत दिशाबाट आउँदै गरेको ना४ख ११४१ नम्बरको ट्रिपरसँग एकापसमा ठक्कर खाँदा सो दुर्घटना भएको हो । मृत्यु हुनेमा ट्रिपर चालक धादिङ नौबीसे–३ बस्ने ४० वर्षीय पुरनप्रसाद पाठक, बसमा सवार कालीकोट पासाङ–६ का ३० वर्षीय अनन्त अधिकारी र अन्य एकको सनाखत हुन बाँकी छ ।
दुर्घटनामा घाइते भएका ४५ जनाको बुटवलस्थित लुम्बिनी अञ्चल अस्पतालमा    उपचार भइहरेको छ । जसमध्ये पाँच जनाको अवस्था गम्भीर रहेको नवलपरासी प्रहरीले जनाएको छ  ।