लगातारको वर्षाले चितवन र नवलपरासी प्रभावित

भरतपुर । लगातारको वर्षाका कारण आएको बाढीले चितवनका विभिन्न  क्षेत्रको जनजीवन प्रभावित भएको छ । वर्षाका कारण माडीको रिउखोलामा पानीको सतह बढेपछि आवतजावत प्रभावित भएको छ ।
रिउखोला भएर चल्ने गाडाहरु पनि वारपार गर्न सकेका छैनन् । माडीको रिउलगायतका खोलामा पानीको सतह बढेको छ । योसँगै माडी–भरतपुरको यातायात सेवा पनि अवरुद्ध भएको छ । यस्तै नारायणी र राप्ती नदी किनारमा बसोवास गर्ने स्थानीय बासिन्दाहरुमा पनि नदीमा पानीको सतह बढेसँगै त्रास बढेको छ ।
वर्षात्को बेला बाढी र पहिरोको जोखिममा रहेको जिल्लामध्ये एकमा पर्ने चितवनमा वर्षात्सँगै नदीतिरका बासिन्दाहरु मात्र हैन, पहाडी नौ गाविसका बासिन्दाहरु पनि त्रासमा छन् ।
यस्तै नवलपरासीको विभिन्न क्षेत्र पनि डुबानमा परेका छन् । नवलपरासीको दक्षिणी तराई क्षेत्रका हकुई र सुक्रौली गाविसको दुई सय बिघा जमिन डुबानमा परेको छ भने भुताहा–६ विजयपुरको दुई थारु गाउँ डुबानमा परेको छ ।
स्थानीइ भगवानदास हरिजनका अनुसार हकुई र सुक्रौली गाविसका दुई सय बिघा जमिन डुबानमा परेको छ भने बाढी गाउँसम्म पस्ने खतरा बढेको छ । त्यसैगरी बाढीको कारण नवलपरासीको भूताहा–१ भानुनगरमा रहेको हेडडब्बा पुल भत्कने खतरा बढेको छ ।
त्यसैगरी बाढीको प्रभाव नवलपरासीको दाउन्नेदेवी–२ केराबारीमा पनि परेको छ । केराबारीका पाँच घर र दुई सय मिटरको बाटो पनि डुबानमा परेका छन् । स्थानीय लालबहादुर राना, सीता क्षेत्रीलगायतको पाँच घर डुबानमा परेको सोही ठाउँका इन्द्र गुरुङले जानकारी दिनुभएको छ ।
त्यसैगरी नवलपरासीको हरपुर गाविसको वडा नं. ४, ५ र ७ नम्बर वडाका एक सय बिघाभन्दा बढी जमिन डुबानमा परेको छ । स्थानीय धु्रबनारायण बानियाका अनुसार झरही नदीको बाँध बिहीबार बिहान १० बजेतिर फुटेको कारण गाउँ डुबानमा परेको हो । स्थानीयले बाढी गाउँसम्म पस्ने खतरा बढ्दै गएको बताएका छन् ।