तोडफोड र आगजनीका तीन आरोपी पक्राउ

भरतपुर । गत मंगलबार बिहान नारायणी सामुदायिक अस्पतालको स्वास्थ्य सङ्काय विभागमा तोडफोड र गाडीमा आगजनी गरेको अभियोगमा प्रहरीले तीन जनालाई पक्राउ गरी मुद्दा चलान गरेको छ ।
यसरी पक्राउ पर्नेहरुमा काठमाडौं बस्ने राजन विष्ट, चितवन पिठुवाका निशान तामाङ र भरतपुरका परशुराम गैरे रहेको चितवन प्रहरीले जनाएको छ । उनीहरुलाई बुधबार राति बुटवलबाट पक्राउ गरी राति नै चितवन ल्याइएको जिल्ला प्रहरी कार्यालयका प्रहरी नायव उपरीक्षक रवि पौडेलले जानकारी दिनुभयो ।
पक्राउ परेकाहरुलाई बिहीबार नै सार्वजनिक अपराध ऐनअन्तर्गत मुद्दा चलान गरिएको उहाँले बताउनुभयो । अभियुक्तहरुले घटनामा आफ्नो संलग्नता रहेको स्वीकारेको प्रवक्ता प्रहरी नायव उपरीक्षक पौडेलले जानकारी दिनुभयो । यसअघि उनीहरुले प्रयोग गरेको मोटरसाइकल प्रहरीले बरामद गरेको थियो ।
मंगलबार भएको घटनामा अस्पतालको एउटा गाडीमा आगजनी तथा स्वास्थ्य सङ्कायमा तोडफोड हुँदा करिब तीन लाख बराबरको क्षति भएको एनपीआईका प्रबन्ध निर्देशक पुष्पराज शर्माले दावी गर्नुभएको छ ।
घटनामा संलग्नलाई कारबाहीको माग गर्दै विद्यार्थीहरुले नियमित प्रदर्शन गर्दै आएका छन् । पछिल्लो पटक चितवनका स्वास्थ्य संस्थाहरुमाथि पटकपटक आक्रमण भएको छ । सोको विरोधमा प्रदर्शनमा उत्रिएका विद्यार्थीमाथि प्रहरीले हस्तक्षेप गर्दा नौ जना घाइते भएको एनपीआईले आरोप लगाएको छ ।