ट्रकले ठक्कर दिँदा गैँडा घाइते

कावासोती । नवलपरासीको कावासोतीनजिकको जंगलबाट राजमार्ग पार गर्न लागेको गैँडालाई मंगलबार साँझ एउटा भारतीय नम्बर प्लेटको ट्रकले ठक्कर दिएको छ । ठक्कर दिने ट्रकको अगाडिको भाग क्षतिग्रस्त भएको छ भने गैँडाको दायाँ भागमा चोट लागेको छ ।
‘ट्रक क्षतिग्रस्त भएर सडकमै छ । गैँडा जंगलमा छिरेको थियो । बुधबार हात्ती लगेर खोज्दा फेला परेको हो’, चितवन निकुञ्जको लामीचौर मध्यवर्ती उपभोक्ता समितिका अध्यक्ष शारदाप्रसाद अधिकारीले भने । निकुञ्जको टोलीले गैँडाको उपचार गरेको छ ।
भारत अहमदावादबाट आँप लिएर काठमाडौं जाँदै गरेको युपी ३२५२ डीएन ३ एच ०३ को ट्रकको ठक्करबाट गैँडा घाइते भएको हो । घाइते गैँडा हिँडडुल गर्न सक्ने अवस्थामा रहेको अधिकारीले बताए । ट्रक चालकलाई चितवन निकुञ्जको टोलीले नियन्त्रणमा लिएको छ ।