ट्रकको ठक्करबाट युवकको मृत्यु

गैँडाकोट । ट्रकको ठक्करबाट गैँडाकोटमा एक युवकको मृत्यु भएको छ । बुधबार बिहान साढे १० बजेतिर ट्रकले ठक्कर दिँदा गम्भीर घाइते भएका स्थानीय २४ वर्षीय योगेश विकको भरतपुरमा उपचारका लागि ल्याइएपछि मृत्यु भएको प्रहरीले जनाएको छ ।
पूर्वबाट पश्चिम जाँदै गरेको ना २ ख ८६५८ नम्बरको ट्रकले ना.१२प २२०७ नम्बरको मोटरसाइकललाई भृकुटीचोकमा ठक्कर दिँदा त्यसमा सवार विक गम्भीर घाइते भएका थिए । अस्पताल ल्याएपछि उनको मृत्यु भएको चितवन प्रहरीले बताएको छ ।
सो घटनाको विरोधमा क्षतिपूर्तिको माग गर्दै आफन्त र स्थानीयले गैँडाकोटस्थित राजमार्गमा चक्काजाम गरेका छन् । ट्रक र चालकलाई प्रहरीले नियन्त्रणमा लिएको छ ।