१२औं वार्षिकोत्सव मनाउँदै बेसो च्यानल

भरतपुर । विगत १२ वर्षदेखि चितवनलाई मुख्य केन्द्रविन्दु बनाइ सञ्चालन भइरहेको सामुदायिक टेलिभिजन ‘बेसो च्यानल’ले आफ्नो १२औं वार्षिकात्सव भव्यताका साथ मनाउने भएको छ ।
सामुदायिक विकास तथा सञ्चार अभियान नेपालद्वारा सञ्चालित बेसो च्यानलले सप्ताहाव्यापि कार्यक्रम गरी वार्षिकोत्सव भव्यताका साथ मनाउने तयारी गरेको बुधबार आयोजित पत्रकार सम्मेलनमा जानकारी दिइएको छ ।
देवघाटका वृद्धवृद्धाहरुलाई फलफूल वितरण गरी च्यानलले आफ्नो सप्ताहव्यापी कार्यक्रमको उद्घाटन गरेको छ । सो अवसरमा बेसो च्यानलका अध्यक्ष ऋषिराज पाण्डेले सामुदायको हितका लागि लागेको च्यानलले बढी प्रचारप्रसार भन्दापनि सेवामूलक कार्यक्रम गर्ने सोचका साथ अगाडि बढेको बताउनुभयो ।
बेसो च्यानलका अध्यक्ष ऋषिराज पाण्डे, कोषाध्यक्ष धनञ्जय खनाल, प्रबन्ध निर्देशक भुपेन्द्र बस्नेत, क्रियटिभ डाइरेक्टर कोमलचन्द्र भगत सञ्चालक समिति सदस्य भुवन नेपाली ‘प्यासी’, कृष्णप्रसाद भट्टराई र समाचार संयोजक कृष्णचन्द्र भट्टराईलगायतको टोली देवघाट पुगी वृद्धवृद्धालाई फलफूल वितरण गरेको थियो ।
बुधबार नै सोही समूहले नारायणगढको ‘हाम्रो घर’मा रहेका बालबालिकाहरुलाई पनि फलफूल वितरण गरेको छ ।
सप्ताहव्यापी कार्यक्रम अन्र्तगत आज साउन २५ गते विभिन्न स्थानमा गएर दर्शकहरुसँग प्रतिक्रिया लिने र कार्यक्रम विशेष सञ्चालन गर्ने, २६ गते बिहान ७ बजे च्यानलको परिसरमा रक्तदान कार्यक्रम गर्ने, २७ गते उच्च माविस्तरीय हाजिरीजवाफ प्रतियोगितालगायतका कार्यक्रम गरिने छ ।
त्यस्तै २८ गते खुल्ला कविता वाचन, २९ गते खुल्ला बृहत् लोकदोहोरी तथा लोकगीत कार्यक्रम र ३० गते ४ बजे वार्षिकोत्सव समापन कार्यक्रम गरिने आयोजित पत्रकार सम्मेलनमा च्यानलका प्रबन्ध निर्देशक भुपेन्द्र बस्नेतले जानकारी दिनुभयो ।