चोरीको बियरसहित दुई जना पक्राउ

भरतपुर । जिल्ला प्रहरी कार्यालय चितवनले चोरी गरी लुकाएको अवस्थामा ९५१ कार्टुन बियरसहित दुई जनालाई पक्राउ गरेको छ ।
नवलपरासीको मुकुन्दपुरस्थित गोर्खा ब्रुअरी प्रालिबाट काठमाडौं लैजानेक्रममा हराइरहेको दुई लाख ८२ हजार ४३७ रुपैयाँ बराबरको ९५१ कार्टुन बियरसहित पोखराका ३६ वर्षीय चन्द्रबहादुर कार्की र ३१ वर्षीय विपीन केसीलाई बुधबार प्रहरीले नियन्त्रणमा लिएको हो । 
ट्रकमा राखेर गत भदौ २६ काठमाडांै लैजान लागेको सो बियर सोही दिनदेखि नै गाडीसहित हराएको थियो । ना ३ ख ५८६२ नम्बरको सो ट्रकसहित ती दुई जनालाई प्रहरीले पक्राउ गरेको हो ।
बेपत्ता पारिएको सो ट्रक बेवारिसे अवस्थामा मुग्लिन बजारमा खाली भेटिएको थियो । सो ट्रकमा लोड गरिएका बियर भने पोखरामा लुकाइ राखेको अवस्थामा बरामद गरिएको चितवन प्रहरीले जनाएको छ । ट्रक चालक वीरकाजी तामाङ भने फरार रहेको र उनको खोजी जारी रहेको प्रहरीले बताएको छ ।
घटनाबारे थप अनुसन्धानका लागि चितवन प्रहरीले बरामद भएको सामान, संकलित कागजात र पक्राउ परेका दुई जनालाई बुधबारै इलाका प्रहरी कार्यालय गैँडाकोटमा बुझाएको छ ।