शनिबार विदामा सरकारी गाडि लिएर चितवन

रत्ननगर । सरकारी विदाको दिन पनि सरकारी गाडिको दुरुपयोग हुने गरेको नौलो होइन तर पनि सुनसरी देखि सरकारी गाडि चितवनसम्म घुम्न आउनु नयाँ कुरो हो । हिजो शनिबार सुनसरीका स्थानीय विकास अधिकारी राजेन्द्र पाण्डेले चड्ने गाडि चितवनमा विद्यार्थीहरुले नियन्त्रणमा लिएका छन ।

नेकपा–माओवादी र उसको विद्यार्थी संगठन अनेरास्ववियु क्रान्तिकारीले एलडिओ पाण्ढेको को १ झ ३३३ नम्बरको गाडी नियन्त्रणमा लिई इलाका प्रहरी कार्यालय रत्ननगरमा बुझाएका छन ।

सरकारी कर्मचारीले बिदा वा शनिबारको दिन सरकारी गाडी चलाउन परे प्रमुख जिल्ला अधिकारीले स्वीकृत गरेको पासको अनिवार्य व्यवस्था हुनुपर्ने हुन्छ । तर स्थानीय विकास अधिकारी पाण्डेसँग कुनैपनि कागजात नभएपछि कारबाहीका लागि नियन्त्रणमा लिएको इलाका प्रहरी कार्यालयमा आयोजित पत्रकार सम्मेलनमा अनेरास्ववियु क्रान्तिकारीका जिल्ला उपाध्यक्ष सरोज भण्डारीले जानकारी दिनुभयो ।

सुनसरीका प्रमुख जिल्ला अधिकारीले चितवनका प्रमुख जिल्ला अधिकारी हिमनाथ दुवाडीलाई पत्र पठाइ कागजात बनाएर गाडी छोडिदिन लिखित आग्रह गरेपछि कागजात बनाएर गाडी छाडिएको इलाका प्रहरी कार्यालय रत्ननगरका प्रमुख प्रहरी निरीक्षक देवेन्द्रबहादुर पालले जानकारी दिनुभयो ।